辣椒研究所 - 第三回：涼拌蒟蒻粉皮

天氣熱，最好就係食下啲涼拌嘢。今次同大家介紹呢個食物5分鐘就可以搞得掂，方便快捷又好食！

平時出街食嘅粉皮好多時都會太薄，冇咩口感。今次同你地介紹呢一隻係叫做「大地之作健康粉皮」嘅蒟蒻粉皮，我平時喺超級市場買，通常係放喺芋絲隔離。上網亦都有得訂，大約$10一包，超抵食。本身佢係零卡路里，又唔含澱粉質，減肥食一流。最緊要係佢嘅口感係痴線咁好食！

我會預先將粉皮放喺雪櫃，將包裝拆開之後沖水，然後用筲箕格水。之後落日式麻醬，再加一匙羹我哋嘅「手造蒜蓉辣椒醬」，將佢撈勻基本上就食得。如果食重口味嘅朋友可以落少少豉油，就會更加濃郁。我自己會加啲芝麻令佢更加香。最後隨意加你自己鍾意嘅餸，我通常都會加雞絲、青瓜同埋芫茜。因為屋企冇嘅關係我就落咗日本大葱，一樣咁好食！ 嗰陣蒜香味同埋辣味好刺激，一定冇得輸，零罪惡感，減肥人士一流！亦都係我呢排帶返返公司嘅最佳「涼」物！